توێژەران چارەسەرێکی نوێ بۆ دابەزاندنی کێشی جەستە ئاشکرادەکەن، کە بریتییە لە سوودوەرگرتن لەرێگای ئامێرێکی تایبەتەوە.
ماڵپەڕی سکای نیوز بڵاویکردووەتەوە، لە نوێترین توێژینەوەی تەندروستی دەربارەی چۆنیەتی دابەزاندنی کێشی جەستە و رێگاکانی، توێژەران گەیشتوون بە دەرئەنجامێكی نوێ و کاریگەر، ئەویش بریتییە لە کەمکردنەوەی حەزی خواردن لای کەسی بەرامبەر لەرێگای ئامێرێکی تایبەتمەندەوە کە بە سەری مرۆڤەوە دەلکێندرێت.
هاوکات، شێوازی چارەسەرەکە بریتییە لە ئامادەکردنی ئامێرێکی تایبەت بەناوی TDCS و پاشان دەکرێتە بەشی سەرەوەی سەری مرۆڤ، دواتر لە رێگای کۆمەڵێك هەستەوەرەوە تەزوو بە دەمارە خانەکانی مێشک دەگەیەنێت، بەشێکی ئەو کاریگەریەش کە ئامێرەکە دروستی دەکات، پەیوەندی بە ئارەزووی خواردنەوە دەبێت و بەرێژەیەکی گونجاو کەمیدەکاتەوە.
ئاماژە بەوەشدراوە، ئەم رێگایە لەسەر ژمارەیەک کەس تاقیکرداوەتەوە و سەرجەمییان لەماوەی شەش هەفتەدا هەستیان بە گۆڕانکاریی بەرچاو کردووە و ئارەزووی خواردنیان بەشێوەیەکی گونجاو کەمبووەتەوە.
دابەزاندنی کێشی جەستە، یەکێکە لەو ئامانج و خولیایانەی بەشێکی زۆری مرۆڤەکان دەیانەوێت بەدەستی بهێنن، هەربۆیە چەندین رێگاو شێوازی جیاواز بۆ ئەم مەبەستە هەیە و بەردەوامیش چارەسەری نوێ دەدۆزرێتەوە.
