ئەنجومەنی وەزیرانی هەرێم رایدەگەیەنێت، وەزارەتی دارایی دەبێت بەشدار بێت لە پڕۆسەی پێداچوونەوە بە بەشی هەرێمی كوردستان لە خشتەی پێشنیازكراوی خەرجییەكانی مووچە و خەرجییەكانی بەكاربردن كە بە هاوبەشی لە نێوان هەردوو وەزارەتی دارایی هەرێم و عێراقدا ئامادەبكرێت.
بەپێی راگەیەندراوێكی ئەنجومەنی وەزیرانی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ ئەنجومەنی وەزیرانی هەرێم بە ئامادەبوونی نوێنەرانی كورد لە بەغداد كۆبووەوە و بڕیاردرا كە وەزارەتی دارایی و ئابوریی هەرێمی كوردستان، دەبێت بەشدار بێت لە پڕۆسەی پێداچوونەوە بە بەشی هەرێمی كوردستان لە خشتەی پێشنیازكراوی خەرجییەكانی مووچە و خەرجییەكانی بەكاربردن و پڕۆژەكانی بودجەی وەبەرهێنان و بودجەی پەرەپێدانی هەرێم و پارێزگاكان و خشتەكانی سەرجەم شایستەكانی ساڵی دارایی 2025 بە هاوبەشی لە نێوان هەردوو وەزارەتی دارایی هەرێم و عێراق ئامادەبكرێت كە بە تایبەتی بۆ بەشی هەرێم و شایستەكانی و پلەی وەزیفی و میلاك بە گوێرەی دەستوور و بڕیاری دادگای باڵای فیدڕاڵی.
هەر لە كۆبوونەوەكەدا بڕیاردرا وەفدێك لە نوێنەرانی هەرێمی كوردستان لە بەغداد، لەگەڵ سەرۆك وەزیرانی عێراق كۆببێتەوە و پەیامی هەرێمی كوردستانی پێبگەیەنن كە پێویستە وەك قەوارەیەكی فیدراڵی و دەستووریی مامەڵە لەگەڵ هەرێمی كوردستان بكرێت و بۆ ساڵی 2025 كێشەی مووچە چارەسەربكرێت.
