پەیوەندییەکانی ئێران و روسیا دەچنە قۆناغیکی جیاوازەوە، لە نوێترین بواریشدا دەرگای تاقیکردنەوەی”کەشتی ئاسمانیشیان” بەڕووی یەکدیدا دەکەنەوە.
میدیا جیهانییەکان بڵاویانکردووەتەوە، ئێران بە سوودوەرگرتن لە وێستگەیەکی ئاسمانی روسی، دوو مانگی دەستکردی بەناوەکانی “کەوسەر و هودهود” ئاراستەی بۆشایی ئاسمان کردووە، کە دروستکراوی ئێرانن.
دەشڵێن، “مانگە دەستکردەکان بە ئامانجی لێکۆڵینەوە و بەدەستهێنانی زانیاریی ڕەوانەی بۆشایی ئاسمان کراون، بڕیاریشە لە داهاتوودا، ئێران چەند مانگێکی دیکەش ڕەوانەبکات”.
ئێران و روسیا بە دوو هاوپەیمانی گرنگ لە ناوچەکەدا ناسراون، لەرووی سەربازیی و هەواڵگری و ئابووریی و بازرگانییەوە پەیوەندییەکی بەهێزیان هەیە، و لەم دواییانەدا بواری بۆشایی ئاسمان و مانگی دەستکردیشی گرتەوە، دوای ئەوەی ئاسانکارییەکی بەرچاویان بۆ پڕۆسەی تاقیکردنەوە و هەڵدانی مانگە دەستکردەکانی یەکتر کرد.
