ئەنتۆنی بلینکن وەزیری دەرەوەی ئەمریکا رایدەگەیەنێت، تەنها رێگای کۆتاییهاتن بە جەنگ لە کەرتی غەززە رێکەوتنی ئاگربەست و ئاڵوگۆڕی دیلەکانە.
بلینکن لە لێدوانێکدا بۆ رۆژنامەی نیویۆرک تایمز رایگەیاند، ئەگەر لە ماوەی دوو هەفتەی داهاتوودا نەتوانن رێکەوتنی ئاگربەست لە کەرتی غەززە ئەنجامبدرێت، ئەوا دەکەوێتە دەستی ئیدارەی ترەمپ و ئەوکاتە ئەوان بڕیار لە چارەنووسی دەدەن.
وتیشی، ئازارەکانی خەڵکی غەززە پاڵنەربوون بۆ ئەنجامدانی رێکەوتنی ئاگربەست و رادەستکردنەوەی بارمتەکان.
ئاشکراشیکرد، حەماس یەکێک بووە لە لەمپەڕەکانی بەردەم رێکەوتن، بەڵام رووداوەکانی دوای 7 ی ئۆکتۆبەر دووبارەنابنەوە، بەهۆی ئەوەی ئیسرائیل بەشێکی زۆر لە تواناکانی حەماسی لەناوبردووە.
رۆژی هەینی کۆبوونەوەی نوێنەرانی ئیسرائیل و حەماس لە دەوحەی پایتەختی قەتەر بەڕێوەچوو،
ئیسرائیل لیستی ناوی ئەو بارمتانەی پێشکەشکردووە کە داوا دەکات بە زیندوویی رادەستی بکرێنەوە.
