چەند کۆمپانیایەکی هێڵە ئاسمانییەکانی ئەوروپا، نیگەرانییان دەربارەی بارودۆخی رۆژهەڵاتی ناوەراست دەردەبڕن و دەڵێن “لەکاتی گەشتەکاندا هەست بە سەلامەتی ناکەین”.
چەند کۆمپانیایەکی هێڵە ئاسمانییەکانی ئەوروپا رایانگەیاند، لەکاتی گەشتە ئاسمانییەکانماندا بۆ وڵاتانی رۆژهەڵاتی ناوەراست و کەنداو، هەست بە دڵنیایی و سەلامەتی ناکەین و پێشبینیی رودانی هەموو حاڵەتێکی نەخوازراو دەکەین.
هاوکات، هەرچەندە لەو ناوچانەی ئاڵۆزی و جەنگی تێدایە، بڕیاری قەدەغەکردنی گەشتە ئاسمانییەکان دراوە، بەڵام هەر نەبووەتە هۆی دابینکردنی دڵنیایی لای فڕۆکەوان و کۆمپانییاکانی تایبەت بە گەشتە ئاسمانییەکان.
هەر لەو چوارچێوەیەدا، دوای هێرشە مووشەکیەکانی ئیسرائیل و ئێران، عێراق ناچاربوو بەبڕیارێک دەرگای گەشتە ئاسمانییەکانی وڵاتەکەی دابخات.
ئەمە لەکاتێکدایە، لەماوەی رابردودا رۆژهەڵاتی ناوەراست روبەڕووی چەندین ململانێ و گرژی و جەنگ بووەتەوە، کە ئەمەش بووەتە هۆی ناسەقامگیربوونی ناوچەکە، لەوانە: جەنگی ئیسرائیل و فەلەستین، ئاڵۆزییەکانی سوریا و لوبنان و ئێران.
