بەڕێوەبەرایەتیی رەگەزنامە و باری شارستانیی سلێمانی رایدەگەیەنێت، بەمەبەستی ئەنجامدانی جەردی ساڵانە و پاكتاوكردنی كاروباری ژمێریاری لە سبەینێوە مامەڵەی كارتی نیشتیمانی رادەگیرێت و داوا لە هاوڵاتییان دەكەین سەردانی بەڕێوەبەرایەتیمان و فەرمانگانەكانی كارتی نیشتمانی سنووری پارێزگای سلێمانی نەكەن.
بەپێی راگەیەندراوێكی بەڕێوەبەرایەتیی رەگەزنامە و باری شارستانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، بە فەرمانی بەڕێوەبەرایەتیی گشتیی رەگەزنامەی هەرێمی كوردستان و بەمەبەستی ئەنجامدانی (جەردی ساڵانە) و (هەڵگرتنی سەرەتاكان) و (ئەنجامدانی ئاماری ساڵانە) و (پاكتاوكردنی كاروباری ژمێریاری) رۆژی سێشەممە لە بارەگای بەڕێوەبەرایەتیمان و سەرجەم فەرمانگەكانی ئیشوكار و مامەڵەی كارتی نیشتمانی رادەگیرێت.
هەر لە راگەیەندراوەكەدا هاتووە، داوا لە هاوڵاتییان دەكەین سەردانی بەڕێوەبەرایەتیمان و فەرمانگانەكانی كارتی نیشتمانی سنووری پارێزگای سلێمانی نەكەن.
