فەرماندەی گشتیی هەسەدە ئامادەیی بۆ گەڕاندنەوەی روفاتی سلێمان پاشا و پاراستنی ناوچە مێژووییەكان دووپاتدەكاتەوە.
مەزڵوم عەبدی، فەرماندەی گشتیی هێزەكانی سوریای دیموكرات (هەسەدە) رایگەیاند، لەمیانەی ئەو هەڕەشەیەی رێكخراوی داعش لە ساڵی2015 دا دروستیكرد، بەشداریمانكرد لە پاراستنی روفاتی “سلێمان پاشا” لەڕێی ئاسانكاریكردن بۆ گواستنەوەی بۆ ناوچەی ئاشمە.
عەبدی لە پەیامێكدا لە تۆڕی ئێكس وتیشی، “ئەمڕۆش جەخت لەسەر پابەندبوونی تەواومان بە پاراستنی ناوچە مێژووییەكان دەكەینەوە و، ئامادەین بۆ هەماهەنگیکردن لەگەڵ سەرجەم لایەنە پەیوەندیدارەكان بۆ ئاسانكاریكردن بۆ گەڕانەوەی روفاتەكەی بۆ مەزارگە رەسەنەكەی خۆی، بەو شێوازەی گونجاوە لەگەڵ رێككەوتنە نێودەوڵەتییەكان و بە رێزگرتنی تەواو لە كەلەپوری رۆشنبیری”.
