یەکەمین کۆنفرانسی زانستیی مەولەویناسی بە هاوبەشیی زانکۆی سلێمانی و ماڵپەری مەولەوی دەستیپێكرد و ماوەی دوو رۆژ بەردەوامدەبێت.
د. کۆسار محەمەد، سەرۆکی زانکۆی سلێمانی ئەمڕۆ لە دەستپێكی كۆنفرانسەكەدا رایگەیاند، توانا و بیرکردنەوەکانی مەولەویی شاعیر تەنها لە بوارێکی دیاریکراودا نەبوون، بەڵکو هەمەجۆربوون و پێویستیشە سوودیان لێببینرێت.
هاوكات د. محەمەد تاتانی، سەرۆکی لیژنەی زانستی کۆنفراسەکە رایگەیاند، لەماوەی پێشکەشکردنی توێژینەوە زانستییەکاندا 86 پوختەی توێژینەوە پێشکەشی لیژنەی زانستی کۆنفرانس کراوە، لەو ژمارەیە 46 توێژینەوە رەزامەندی لیژنەکەیان بەدەستهێناوە.
وتیشی، “لە چەندین وڵاتی جۆراوجۆرەوە توێژینەوە پێشکەشی کۆنفرانسەکە کراوە لەوانە، عێراق، ئێران، میسر، جەزائیر، یەمەن، تورکیا و ئەڵمانیا”.
مەولەوی، ناوی تەواوی سەید عەبدولرەحیمی کوڕی سەید تاوەگۆزییە، لە ساڵی 1806 لەدایکبووە و لەساڵی 1882 کۆچی دواییکردووە، بە یەکێک لە شاعیرە مەزن و کاریگەرەکانی ئەدەبیاتی کوردی و بواری سۆفیگەری دادەنرێت.
