ئەنجومەنی وەزیرانی هەرێم رایدەگەیەنێت، حكومەتی هەرێم، لە هەوڵەكانی بەردەوامە لەگەڵ حكومەتی عێراق بۆ دابینكردنی مووچەی مووچەخۆرانی هەرێم و هەروەك لە دوا كۆبوونەوەی نوێنەرانی هەرێمی كوردستان لەگەڵ سەرۆكی دادگای باڵای فیدراڵیش جەختیلێكراوەتەوە كە پێویستە بابەتی مووچە، تێكەڵی هیچ كێشە و ناكۆكییەكی سیاسی نەكرێت.
لە راگەیەندراوەكەی حكومەتی هەرێمدا هاتووە، پێویستە وەك ناوچەكانی دیكەی عێراق، مووچەی مووچەخۆرانی هەرێمیش بدرێت، وەك شایستەی یاسایی خۆیان لە بەرامبەر وەزیفەكانیان، هاوشێوەی هاوتاكانیان لە ناوچەكانی دیكە.
ئاماژە بۆ ئەوەش كراوە، لە كۆبوونەوەكە بابەتی مووچە و شایستە داراییەكانی هەرێمی كوردستان، بە تایبەتی بۆ هەر سێ مانگی 10 و 11 و 12ی ئەمساڵ گفتوگۆی لەبارەوە كراوە، جەخت لەوە كرایەوە حكومەتی هەرێمی كوردستان، لە هەوڵەكانی لەگەڵ حكومەتی عێراق بۆ دابینكردنی مووچەی مووچەخۆرانی هەرێم بەردەوامدەبێت.
