ئەمڕۆ بڕگەی یەكەمی قۆناغی كۆتایی سەرژمێریی گشتی دەستیپێكرد و بەڕێوەبەرایەتیی ئاماری هەولێر كارەكانیان رووندەكاتەوە.
بەڕێوەبەرایەتیی ئاماری هەولێر لە كۆنگرەیەكی رۆژنامەنووسیدا دەستپێكردنی بڕگەكەی راگەیاند و روونیكردەوە، بژمێرەكانیان لەمڕۆوە سەردانی ماڵەكان دەكەن و فۆڕمی خێزان كە چەند پرسیارێكی كورتە ئاراستەی خێزانەكان دەكەن.
ئەم قۆناغە لەمڕۆوە تا 19ی مانگ بەردەوام دەبێت و تیایدا چەند پرسیارێكی سەرەتایی لە خێزانەكان دەكرێت.
ئاماری هەولێر روونیشیكردەوە، رۆژانی 20 و 21ی ئەم مانگەش كە قەدەغەی هاتوچۆی تیایدا دەبێت، هەمان بژمێر سەردانی هەمان ماڵ دەكات و زانیارییەكان تۆماردەكەن، لەگەڵ هەر گۆڕانكارییەك كە لە ژمارەی خێزانەكاندا روویدابێت.
بڕگەی دووەمی قۆناغی كۆتایی لە رۆژانی 20 و 21 دەبێت و تیایدا فۆڕمی ئەژماركردن پڕدەكرێتەوە كە 77 پرسیار لە خۆدەگرێت، ئاماری هەولێر روونیكردەوە.
روونیشیكردەوە، رۆژی 22ی تشرینی دووەم فۆڕمەكان دادەخرێن و ناونوسین دەوەستێت.
