ئەندامێکی لیژنەی دارایی ئەنجومەنی نوێنەرانی عێراق رایگەیاند، وەزارەتی دارایی عێراق تێبینی هەیە لەسەر لیستی مووچە، سەرەڕای ئەوەی دەبوایە مووچە لە بانکە فیدڕاڵییەکان تەوتین بکرێت، بەڵام حکومەتی هەرێم دەیەوێت لە بانکی ئەهلی بیکات.
موعین کازمی، ئەندامی لیژنە دارایی ئەنجومەنی نوێنەرانی عێراق لە چاوپێکەوتنێکی تەلەفزیۆنیدا رایگەیاند، بڕیارێک هەیە لە ئەنجومەنی وەزیران بۆ ئەوەی پارە بۆ مووچەی فەرمانبەرانی هەرێم رەوانە بکرێت و سودانیش لە سەردانەکەی ئەمڕۆدا لەگەڵ بەرپرسانی هەرێم باس لە کێشەکان و رێکارەکان دەکات لەگەڵیاندا بۆ ئەوەی چارەسەر ببن.
ناوبراو باسی لەوەشکرد، فەرمانبەران و مووچەخۆرانی هەرێم هیچ تاوانێکیان نییە، پێویستە داتاکانی فەرمانبەران و مووچەخۆران بەشێوەیەکی روون و شەفاف رەوانە بکرێت بۆ بەغداد بۆ ئەوەی کێشەی تەکنیکی دروستنەبێت بۆیان و مووچەکانیان لە کاتی خۆیدا وەربگرن.
هاوکات، ئاماژەی بەو کێشانەی دیکەش کرد کە بوونیان هەیە، لەوانە کێشەی هەناردەنەکردنەوەی نەوت و گۆڕانکاری لە ژمارەی فەرمانبەرانی هەرێمی کوردستان کە ژمارەکە زیادیکردەوە، و کێشەی تەوتین نەکردنی مووچە لە بانکە فیدڕاڵییەکان و نەگەڕاندنەوەی داهاتە ناوخۆییەکان و باج، هۆکاری کێشەکانی نێوان هەرێم و بەغدادن.
