وتەبێژی یەکێتیی نیشتمانیی کوردستان رایگەیاند، یەکڕیزی زامنی هێنانەکایەی سەقامگیریی سیاسی و ئابوری و ئاوەدانییە لە حکومەتی ئایندەدا.
سەعدی ئەحمەد پیرە، وتەبێژی یەکێتیی نیشتمانیی کوردستان رایگەیاند، کۆمەڵانی خەڵکی کوردستان بە سوپاسەوە بەشدارییەکی فراوانیان لە هەڵبژاردن کرد و لایەنە سیاسییەکانیان خستە ژێر بەرپرسیارێتییەکی گەورە بۆ پێکهێنانی پەرلەمان و حکومەتێکی کارا بە ئامانجی زیاتر فەراهەمکردنی خۆشگوزەرانی و ئاوەدانی و ئایندەیەکی پڕشنگدار بۆ تەواوی خەڵکی کوردستان.
ئاماژەی بەوەش کرد، ئەم ئەرکە بە پاراستنی یەکڕیزی و هاوهەڵوێستی و هەستکردن بە گیانی بەرپرسیارییەتیی سەرجەم هێز و لایەنە سیاسییەکان بەدیدێت، بۆیە یەکڕیزی و تەبایی زامنی هێنانەکایەی ئایندەیەکی روون و سەقامگیریی سیاسی و ئابوری و ئاوەدانییە لە حکومەتی ئایندەدا، بەمەش لەبەرامبەر حکومەتی عێراق بەهێز و یەکگرتووتر دەردەکەوین.
ئەو وتانەی سەعدی ئەحمەد پیرە لە میانەی کۆبوونەوەیدابوو لەگەڵ ئەندرو بیزلی کونسوڵی گشتیی شانشینی یەکگرتووی بەریتانیا لە هەرێمی کوردستان.
هاوکات ئەندرو بیزلی، رایگەیاند، گەل و حکومەتی بەریتانیا بەچاوی بایەخپێدانێکی گەورەوە دەڕوانێتە هەرێمی کوردستان و پێگەکەی لە ناوچەکە و پیرۆزبایی لە سەرکەوتنی پرۆسەی هەڵبژاردن دەکات و خوازیاری ئەوەیە کە هێز و لایەنە سیاسییەکان بگەنە خاڵی هاوبەش و پەلەکردن لە پێکهێنانی حکومەتی نوێی هەرێمی کوردستان، هەروەها حکومەتی بەریتانیا خوازیاری سەقامگیری و بەرەوپێشەوەچوونی هەرێمی کوردستانە لە سەرجەم بوارەکاندا.
