بەڕێوەبەرایەتیی بەرگریی شارستانیی هەولێر ئامارەکانی رووداوەکانی ئاگرکەوتنەوەی لە شارەکە لە ماوەی 10 مانگی رابردوودا بڵاوکردەوە و ئاشکرایکرد، زیاتر لە دوو هەزار رووداوی ئاگرکەوتنەوەی جۆراوجۆر تۆمارکراون.
بەڕێوەبەرایەتیی بەرگریی شارستانیی هەولێر بڵاویکردەوە، لە 1 ی کانوونی دووەمی ئەمساڵ تا 31 ی تشرینی یەکەمی ئەمساڵ دوو هەزار و 57 رووداوی ئاگرکەوتنەوەی جۆراوجۆر لە شاری هەولێر روویانداوە کە لە ماڵ و شوێنە گشتییەکان و زەوییە کشتوکاڵییەکان کەوتوونەتەوە.
ئاشکراشیکرد، هەر لەو ماوەیەدا 22 کەس گیانیان لەدەستداوە و 89 کەس برینداربوون.
سەبارەت بە تۆمارکردنی حاڵەتەکانی خنکان، بەرگریی شارستانیی هەولێر باسیلەوەکردووە، بە کۆی گشتیی 28 حاڵەت بووە و ژیانی 56 کەسیش رزگارکراوە.
