قوباد تاڵەبانی، لێپرسراوی مەكتەبی سكرتارییەتی سەرۆك مام جەلال لە دەباشان پێشوازی لە میری ئێزیدییان میر حازم تەحسین بەگ و هاوژینی كرد و پشتیوانیی سەرۆك بافڵ و یەكێتیی نیشتمانیی كوردستانی بۆ خوشك و برایانی ئێزیدی دووپاتكردەوە.
لە دیدارەكەدا كە ئەمڕۆ شەممە بەڕێوەچوو، قوباد تاڵەبانی، جەختیكردەوە كە ماڵی مام جەلال وەك هەمیشە ماڵی هەموو ئێزدییەكانە و سڵاو و ڕێزی تایبەتی سەرۆك بافڵیشی پێگەیاندن.
میر حازم تەحسین و وەفدی میوان ستایشی رۆڵی سەرۆك مام جەلالیان كرد لە بەرگریكردن لە كوردانی ئێزدی و خۆشحاڵی خۆیان بۆ تێگەیشتنی یەكێتی و سەرۆكایەتییەكەی لە خەموژانی ئێزیدییەكان دەربڕی، هەردوولاش هاوڕابوون لەسەر دروستكردنی میكانیزمێكی هەماهەنگی لە نێوان یەكێتی و ئێزیدییەكان.
لە بەشێكی تری دیدارەكەدا قوباد تاڵەبانی بە گرنگی زانی یاسای رزگاربووانی ئێزیدی ژمارە 8ی ساڵی 2021 كە ئەنجومەنی نوێنەرانی عێراق پەسەندیكردووە، لە هەرێمی كوردستانیش بەركاربكرێت و كاری پێبكرێت.
لە بەشێكی تری كۆبوونەوەكەدا هەمووان هاوڕابوون لەگرنگی بەشداریكردنی ئێزیدییەكان لەسێكتەرە جیاجیاكانی دەسەڵات و دیاریكردنی نوێنەری تایبەت بە خوشك و برایانی ئێزیدی لە پێگەكانی حكومڕانیی هەرێمی كوردستان، هەر بۆ ئەو مەبەستەش، قوباد تاڵەبانی ئەوەی بەگرنگ زانی كە لە حكومەتی داهاتوودا خزمەتی هەموو پێكهاتەكانی هەرێمی كوردستان بكرێت.
