پارێزگاری بانکی ناوەندیی فەرەنسا پێیوایە سەرکەوتنی ترەمپ لە هەڵبژاردنی سەرۆکایەتیی ئەمریکا مەترسییەکانی سەر ئابوریی جیهانی زیاددەکات.
فرانسوا ڤیلێرۆی، پارێزگاری بانکی ناوەندیی فەرەنسا و ئەندامی دەستەی بەڕێوەبەرانی بانکی ناوەندیی ئەوروپا، لە میانەی بەشداریکردنی لە کۆنفرانسێکدا لە شاری لیۆنی فەرەنسا پێشبینی ئەوەیکرد کە خولی دووەمی سەرۆکایەتیی دۆناڵد ترەمپ ببێتە هۆی کورتهێنانی زیاتری بودجە و مەترسی بۆ سەر بازرگانیی وڵاتەکە، ئەوەش دەبێتە هۆی مەترسی لەسەر ئابوریی جیهانی.
ڤیلێرۆی پێیوایە کە بەڵێنەکەی ترەمپ بۆ بەرزکردنەوەی باج لەسەر هاوردەکردن بە مانای هەڵاوسانی زیاترە و بە ئەگەرێکی زۆرەوە گەشەسەندنی ئابوری لە جیهاندا کەمدەبێتەوە.
دوێنێ ئەمریکییەکان دۆناڵد ترەمپی سەرۆکی پێشووتری وڵاتەکەیان کردەوە بە سەرۆک و بووە 47ەمین سەرۆکی وڵاتەکە.
