وەزیری بازرگانیی عێراق دووپاتیکردەوە، دەیانەوێت لە رێگەی کۆنترۆڵەوە پشتگیریی تەواو لە هەناردەی عێراقی بکەن و قەبارەی هەناردەکردن زیادبکەن، چونکە گرنگییەیکی زۆری هەیە بۆ پاڵپشتیی ئابوریی عێراق.
ئەسیر داود غرێری، وەزیری بازرگانیی عێراق رایگەیاند، دەمانەوێت هانی هەناردەکردنی بەرهەمی ناوخۆیی بدەین، بۆ ئەو مەبەستەش هەنگاوی کردەیی و پلان بۆ داڕێژراو دەگرینەبەر بۆ بەدەستهێنانی و دەمانەوێت کاڵای عێراق رکابەری بکات لە بازاڕە جیهانییەکان.
هاوکات، باسی لەوەکرد کە تیمێکی کارکردن پێکدەهێنت سەبارەت بەو پلانە بازرگانییەی کە وەزارەت ئامادەی کردووە بە بەشداریی ئەندامانی لیژنەی بانکی ناوەندی، ژوورە پیشەسازی و بازرگانییەکان و بەشی پەیوەندییە ئابورییەکانی وەزارەت، بە مەبەستی پەرەپێدانی تێڕوانی ورد بۆ رێکخستنی داتاکان و ئامادەکردنی راپۆرتی ورد لەسەر بابەتەکە.
