بافڵ جەلال تاڵەبانی، سەرۆکی یەکێتیی نیشتمانیی کوردستان سەردانی بارەگای ئەنجوومەنی پاراستنی بەرژەوەندییە باڵاكانی یەكێتیی نیشتمانیی كوردستانی کرد و لەلایەن شێخ جەعفەر شێخ مستەفا، لێپرسراوی ئەنجوومەنەکەوە پێشوازیلێکرا.
لەدیدارێکدا دۆخی سیاسیی هەرێمی کوردستان و قۆناغی پاش هەڵبژاردن گفتوگۆیان لەبارەوەکرا، جەخت لە هاوکاری و هەماهەنگیی سەرجەم ئۆرگان و دامەزراوەکانی یەکێتی کرایەوە تاوەکو هەمووان پێکەوە کار بۆ سەرخستنی بەرنامە نیشتمانییەکەی یەکێتی و خزمەتکردنی زیاتری خەڵک بکەن.
لەدرێژەی دیدارەکەدا بافڵ جەلال تاڵەبانی، سەرۆکی یەکێتیی نیشتمانیی کوردستان ستایشی رۆڵی هەڤاڵ شێخ جەعفەر شێخ مستەفا و ئەنجوومەنی پاراستنی بەرژەوەندییە باڵاكانی کرد بۆ سەرخستنی یەکێتی و ئاماژەی بەوەکرد، بە پێزانینەوە لە رۆڵی سەرکردە و تێکۆشەرانی یەکێتی دەڕوانین و هەوڵ و خەباتیان لەپێناو کوردستاندا بەرز دەنرخێنین.
سەرۆکی یەکێتیی نیشتمانیی کوردستان باسی لەوەش کرد، ئێمەش بەشوێنپێی ئەو تێکۆشەرانەدا هەنگاودەنێین کە لەسەر رێبازی سەرۆک مام جەلال خزمەتی گەل و وڵاتیان کردووە.
سەرۆک بافڵ هەموو پشتیوانی و هاوکارییەکی بۆ سەرخستنی ئەرکەکانی هەڤاڵ شێخ جەعفەر و ئەنجوومەنی پاراستنی بەرژەوەندییە باڵاكانی یەكێتی دووپاتکردەوە و رایگەیاند، بەهەمان رۆحییەتی کوردانە و یەکێتییانەوە درێژەپێدەری سیاسەتی حەکیمانەی سەرۆک مام جەلال دەبین، ئامانجمان بەدیهێنانی داهاتوویەکی سەقامگیرتر و هەرێمێکی بەهێزترە، بۆ ئەمەش بە ستراتیژێکی نوێوە هەنگاودەنێین و ئەو بەڵێنەی بە خوێنی شەهیدان و خەڵکی کوردستانمان داوە، دەیبەینەسەر.
لەبەرامبەردا هەڤاڵ شێخ جەعفەر شێخ مستەفا سوپاسی رۆڵی گرنگی سەرۆکی یەکێتی کرد کە پەرۆشانە لەخەمی باشترکردنی ژیانی هاونیشتمانییان و راستکردنەوەی رێرەوی چەوتی حوکمڕانیدایە.
