توێژەرانی توێژینەوەیەکی ئیتاڵی دەڵێن، رێکردنی ماوە کورت رەنگە لە رووی سوودەوە زۆر باشتر بێت لە رێکردنی ماوە درێژ بۆ سیستمی مێتابۆڵیزمی جەستە.
توێژەران باس لەوەدەکەن، رۆیشتن ماسولکەکانی قۆڵ و سنگ و پشت و سک و حەوز و قاچەکان دەجوڵێنێت، بەبێ ئەوەی کەسەکە ماندوو بکات و وزەیەکی زۆری بوێت.
تیمی توێژەرانی ئیتاڵی ئەوەشیان خستووەتەڕوو، رێکردنی ماوەکورت و لە دۆخی جێگیردا، وزەی جەستە دەپارێزێت و کاریگەری لەسەر ئەو کەسانە هەیە کە هەوڵدەدەن وزەی زیاتر بسوتێنن.
ئاماژەیان بەوەشکردووە، ئەم جۆرە وەرزشە کاریگەریی باشی هەیە لەسەر چارەسەرکردنی قەڵەوی و کەمکردنەوەی مەترسییەکانی جەڵتەی مێشک.
روونیشیانکردووەتەوە، لە ئەنجامی توێژینەوەیان لەسەر 10 کەس کە پێنج ژن و پێنج پیاو بوون بەو ئەنجامە گەیشتوون، ئەوانەی لە پشوودابوون و دواتر بۆ چەند خولەکێکی کەم جووڵەیان کردووە بۆ چەند جارێک بەشێوەی دووبارەبووەوە، ئەنجامێکی زۆر باشیان بەدەستهێناوە لە چالاکبوونی مێتابۆڵیزمدا.
