سەرۆكی هەرێمی كوردستان پەیامێك بڵاودەكاتەوە و داوا لە لایەنەكان دەكات دوای پەسندكردنی ئەنجامەكانی هەڵبژاردن داوا لە لایەنە سیاسییەكان بە زووترین كات حكومەت پێكبهێنن.
نێچیرڤان بارزانی، سەرۆكی هەرێمی كوردستان بەبۆنەی راگەیاندنی ئەنجامی بەرایی هەڵبژاردن پەیامێكی بڵاوكردەوە و رایگەیاند، ئەنجامدانی هەڵبژاردن بەشێوەیەكی ئارام و شارستانییانە، سەركەوتنێكی گەورەیە كە جیهان بە رێزەوە سەیری دەكات، بەڵام ئەوەی ئەم سەركەوتنە تەواودەكات و گەلی كوردستان بە پەرۆشەوە چاوەڕێیەتی، ئەوەیە دوای پەسەندكردنی ئەنجامەكان، لایەنە سیاسییەكان بە زووترین كات حكومەت پێكبهێنن.
هاوكات داواشدەكات، حكومەتێك پێكبهێندرێت كە بتوانێت سەقامگیریی پتەوتر و ئابورییەكی بەهێز بهێنێتە ئاراوە و برەوی زیاتر بە مافەكان بدات، پێویستییەكی لەپێشینەی قۆناغ و ئاڵنگارییەكانی ئێستا و بوونیادنانی داهاتووی هاوبەشمانە، ئەوەش بە گیانی پێكەوەیی و تەبایی و هاریكاریی هەموو لایەنە سیاسییەكان و پێكهاتەكان دەكرێت.
