قوباد تاڵەبانی، جێگری سەرۆکی حکومەتی هەرێمی کوردستان سەرپەرشتی کۆبوونەوەیەکی تایبەتی کرد سەبارەت بە رێکخستنەوەی ژێرخانی کار و بازرگانی لە هەرێم و بەهێزکردنی کەرتی تایبەت.
لە دەستپێکی کۆبوونەوەکەدا کە ئەمڕۆ لە ئەنجومەنی وەزیران بەڕێوەچوو، راپۆرتی چۆنییەتی رێکخستنەوەی ژێرخانی کار و بازرگانی خرایەڕوو کە بە هاوکاری لەگەڵ چەند راوێژکارێکی هۆڵەندی و چەند رێکخراوێکی تایبەتمەندی بوارەکە ئامادەکرابوو، هاوکات لە راپۆرتەکەدا ئاماژە بە هەموو کۆسپ و گرفتەکانی بەردەم کاری بازرگانی و وەبەرهێنان کرابوو.
باس لە پڕۆژەی ئەو گەنجە داهێنەرانەش کرابوو کە خوازیاری ژینگەیەکی لەبارترن لە رووی ئیداریی و یاسایی و ئابورییەوە بۆ پەرەپێدانی تواناکانیان و بەگەڕخستنی سەرمایەکانیان لە بوارە جیاجیاکانی وەبەرهێنان و بازرگانی بە ئاراستەی بوژاندنەوەی پڕۆژە مام ناوەندەکان و رەخساندنی هەلی کاری زیاتر.
لە دوای گفتوگۆکردن لەسەر ناوەڕۆکی راپۆرتەکە، قوباد تاڵەبانی، جەختیلەوە کردەوە کە دەبێت هەموو دامودەزگاکانی حکومەت هاوکاری کارسازان و ئەو کەسانە بن کە بیرۆکەی داهێنەرانەیان هەیە لە بواری بازرگانیدا و هەموو جۆرە کارئاسانییەکیان پێشکەش بکەن تا خاوەنکارەکان بتوانن کۆمپانیا و کاری خۆیان بە ئاسانی دابمەزرێنن و هەلی کار بۆ کەسانی دیکەش بڕەخسێنن.
لە کۆتایی کۆبوونەوەکەدا چەندین بڕیار پەسەندکران لەبارەی چۆنییەتی کارئاسانیکردن بۆ بازرگانان و کارسازان و دامەزراندنی کۆمپانیای نوێ و ئاسانکردنی ئەرکی سەرشانی ئەو گەنجانەی کە خوازیاری کاری بازرگانی و داهێنەرانەن درا، هەروەها بڕیاردرا کە ئەم کۆبوونەوانە بەردەوام بن بۆ بەدواداچوونی جێبەجێکردنی راسپاردە و بڕیارەکان.
لەلایەکیترەوە لەپێناو پێشخستنی کارسازی و داهێنان، لە کۆبونەوەکەدا وەزارەتی خوێندنی باڵا و توێژینەوەی زانستی راسپێردرا بابەتی کارسازیی و داهێنان بکرێتە پرۆگرامی خوێندن لە خوێندنی باڵادا.
ئەم کۆبوونەوەیە لە کاتێکدایە کە بڕیارە رۆژی پێنجشەمە کە دەکاتە 25ی کانوونی دووەمی 2024، یەکەمین کۆڕبەندی نێودەوڵەتی بۆ کارسازی و داهێنان لە سلێمانی بەڕێوەبچێت کە تێیدا ژمارەیەک بیرۆکەی نوێی کارسازی دەخرێنەڕوو و جێبەجێدەکرێن.
