ئەمڕۆ 16 ی کانوونی دووەم، سەرکردایەتی یەکێتیی نیشتمانیی کوردستان لە هەولێر کۆبوویەوە و لە کۆبوونەوەکەدا پرسی داهاتووی پەیوەندییەکانی نێوان هەرێم و بەغداد و موچەی فەرمانبەران گفتوگۆی لەبارەوە کراوە.
بەپێی ڕاگەیەندراوێکی سەرکردایەتی یەکێتی لە هەولێر لە كۆبوونەوەكەدا گفتوگۆ كراوە لەبارەی دۆخی هەرێمی كوردستان و ڕۆڵی یەكێتی نیشتمانی كوردستان لە هاوكێشە سیاسییەكان و گۆڕانكارییەكانی ناوچەكە، جەخت لەگرنگی ڕۆڵی یەكێتی كراوەتەوە و ئامادەبووان هاوڕابوون كە دەبێت یەكێتی ڕۆڵی سەرەكی بگێڕێ لە چارەسەری كێشەكان و یەكلاكردنەوەی قەیرانەكان.
ڕاگەیەنراوەکە ئاماژە بەوەشەدکات،بەشێكی تری كۆبوونەوەكە تەرخانكراوە بۆ گفتوگۆكردن لەبارەی دۆخی هەولێر و هەوڵەكانی یەكێتی بۆ خزمەتكردن لەو شارە، جەخت لەوەكرایەوە كە دەبێ بەبێ جیاوازی بیروڕای سیاسی و ئایدۆلۆژی خزمەتی هەولێرو هەولێرییەكان بكرێ.
پەیوەندی نێوان لایەنە سیاسییەكان، ئایندەی پەیوەندییەكانی نێوان هەرێم و بەغداد، چارەسەری كێشەی مووچەو دابینكردنی ژیانێكی شایستە بۆ هاونیشتمانیان لەلایەن حكومەت تەوەری گرنگی كۆبوونەوەكە بوون و گفتوگۆی ورد و جدیان لەبارەوە كراوە.
