ئەنجومەنی پارێزگای كەركوك لە كۆبوونەوەی ئەمڕۆدا بە دەنگدان جێگری پارێزگار و قائیمقامی چەند قەزایەك و سەرۆك و ئەندامانی لیژنەكانی دیاریكرد.
ئێوارەی ئەمڕۆ ئەنجومەنی پارێزگای كەركوك بە سەرۆكایەتیی محەمەد حافز، سەرۆكی ئەنجومەن و بەبێ ئامادەبوونی توركمان، هەندێك لە ئەندامانی عەرەب و ئەندامانی سەر بە پارتی كۆبووەوە.
لە سەرەتای كۆبوونەوەكەدا بە دەنگدان یاوز حەمید وەك جێگری یەكەمی پارێزگاری كەركوك دیاریكرا. هەروەها ئەنجومەنەكە دەنگیدا بە دیاریكردنی عەلی سەعدون ئەحمەد وەك قائیمقامی قەزای حەویجە، عادل محەمەد بە قائیمقامی دبس، سیراجەدین نازم عاسی بە قائیمقامی داقوق.
ئەنجومەنی پارێزگای كەركوك لە درێژەی كۆبوونەوەكەیدا سەرۆك و ئەندامانی لیژنەكانی “پەروەردە، یاسایی، ئاسایش، خزمەتگوزاری، نەوت و وزە، دارایی، پرۆژەكان، كشتوكاڵ، وەرزش و لاوان، پەیوەندییە گشتییەكان، تەندروستی و ماددەی 140″ی دیاریكرد.
