هەڤاڵ ئەبوبەکر رایگەیاند ناکۆکی و دووبەرەکی و بێمتمانەییەکی زۆر و قوڵ کەوتووەتە ناو بزووتنەوەی گۆڕانەوە و وەک کەسێکی تەکنۆکرات و بێلایەن لە ئەرکەکانی خۆمان بەردەوامدەبین.
هەڤاڵ ئەبوبەکر، پارێزگاری سلێمانی داوای بەخشینی لە پۆستەکەی کردووە و لە راگەیەندراوێکدا ئاماژە بەوە دەکات، ”بۆ جاری سێیەم و کۆتایی داوا لە حکومەتی هەرێمی کوردستان دەکەین بەخشینمان لە پۆستی پارێزگاری سلێمانی پەسەندبکات”.
ئەوەشی خستووەتەڕوو، ”بێبەریبوونی خۆمان لە هەردوو ماڵەکەی بزووتنەوەی گۆڕان رادەگەیەنین و لە ئەمڕۆوە وەک کەسێکی تەکنۆکرات و بێلایەن لە ئەرکەکانی خۆمان بەردەوامدەبین تاوەکو ئەو کاتەی بەخشینەکەمان پەسەنددەکرێت یاخود رێکارێکی یاسایی و کارگێڕیی دەگیرێتەبەر بۆ دەستاودەستی پۆستەکەمان لەگەڵ هەر پاڵێوراوێکی دیکەدا”.
دەشڵێت، ”بەداخێکی سەختەوە ناکۆکی و دووبەرەکی و بێمتمانەییەکی زۆر و قووڵ کەوتووەتە ناو بزووتنەوەی گۆڕانەوە و بەسەر دوو ماڵی لێکترازاودا دابەشبوون، ئێمە خۆمان لەو دۆخە بەدوورگرت و هەموو هەوڵێکی کۆکردنەوە و یەکخستنەوە و رێکخستنەوە و قبوڵکردنی یەکتر و کاراکردنەوەی پەیکەری رێکخراوەیی و ناوەندەکانی بڕیاردانماندا، بەڵام نەگەشتینە ئەنجام”.
