دوای ڕاگەیاندنی هەواڵی بڵاوبوونەوەی ئەنفلۆنزای باڵندە لە پارێزگای سەڵاحەدین، ئەمڕۆ هەینی 15ی كانونی دووەم، وەزارەتی كشتوكاڵی عێراق هەواڵەكەی پشتڕاستكردەوە و ڕایگەیاند، “ئەوەی لە سەڵاحەدین بڵاوبووەتەوە، ئەنفلۆنزای باڵندەیە.”
حەمید نابف، وتەبێژی وەزارەتی كشتوكاڵی عێراق وتی، “ڤایرۆسەكە لە ماوەیەكی كەمدا دەیان هەزار پەلەوەری مرداركردووەتەوە و وەزارەتی كشتوكاڵ هەموو ڕێوشوێنەكانی گرتووەتەبەر بۆ مامەڵكردن لەگەڵ پەتاكە و ڕێگرییكردن لە زیاتر بڵاوبوونەوەی.”
لای خۆیەوە، عەمار جەبر، پارێزگاری سەڵاحەدین ئەمڕۆ هەینی ڕایگەیاند، “پشكنینە تاقیگەییەكان سەلماندوویانە ئەوەی لە كێڵگەیەكی پەلەوەری سامەڕا بڵاوبووەتەوە و بووەتەهۆی مرداربوونەوەی دەیان هەزار پەلەوەر، ئەنفلۆنزای باڵندەیە.”
حكومەتی عێراق لەڕێگەی لایەن و دامەزراوە پەیوەندیدارەكانییەوە، داوا لە هاوڵاتییان دەكات خۆیان لەو ڤایرۆسە بپارێزن و بە وریاییەوە مامەڵە لەگەڵ پەلەوەر و بەرهەمەكانی و بە تایبەت گۆشتی مریشكدا بكەن.
