دوای بڵاوبوونەوەی چەندین قسەوباس لەبارەی دروستبوونی گرفت بۆ مووچەی مووچەخۆرانی عێراق بەهۆی دابەزینی نرخی نەوت و دروستبوونی کورتهێنانەکانی بودجەوە، ئەندامێکی لیژنەیی دارایی ئەنجومەنی نوێنەرانی عێراق رایگەیاند، “هیچ کێشەیەک بۆ مووچە دروست نابێت و ئەو قسانە دوورن لە راستییەوە”.
رۆژنامەی سەباحی عێراقی بڵاویکردەوە، جەمال کۆچەر، ئەندامی لیژنەیی دارایی ئەنجومەنی نوێنەرانی عێراق لە لێدوانێکدا پێی راگەیاندوون، مووچەی هەردوو ساڵی 2024 و 2025 بەبێ کێشە دابیندەکرێت و هەر قسەیەکی پێچەوانەی ئەمە بکرێت، بۆ دروستکردنی گومانە لە هەوڵە حکومییەکان.
دڵنیایشیداوە، دابەزینی نرخی نەوت کێشە بۆ مووچە دروستناکات، چونکە پێشتر مووچە دابینکراوە و جگە لەو یەدەگە نەختینەیە گەورەیەی عێراقی خاوەنیەتی و دەتوانێت لە هەر دۆخێکی نەخوازراودا بەکاری بهێنێت.
