وەزارەتی دارایی عێراق رایدەگەیەنێت، لە كۆبوونەوەكانی سبەینێ لەگەڵ حكومەتی هەرێم گفتوگۆ لەبارەی شایستە داراییەكانی هەرێمی كوردستان دەكرێت و تاوتوێی مافە دەستوورییەكانی هەرێم و سەرجەم كێشە هەڵپەسێردراوەكانی نێوان هەردوولا دەكرێت.
بەپێی راگەیەندراوێكی وەزارەتی دارایی عێراق تێیدا هاتووە، ئەنجومەنی وەزاریی كاروباری ئابوری سبەی لە هەولێر كۆدەبێتەوە و تاوتوێی پرسە دارایی و ئابورییەكان لەگەڵ هەرێمی كوردستان دەكرێت.
ئاماژە بۆ ئەوەش كراوە، گفتوگۆ لەسەر شایستە داراییەكانی هەرێم دەكرێت بەپێی رێككەوتنەكان و ئامانجی سەردانەكە بەهێزكردنی پەیوەندییەكانی هەرێم و بەغدایە.
هەر لە راگەیەندراوەكەدا هاتووە، ئامانجی سەردانەكە چارەسەركردنی كێشە هەڵپەسێردراوەكانی نێوان هەردوولایە بەپێی دەستوور و یاسا بەركارەكان.
