بەڕێوەبەری ناحیەی خەلەکان رایگەیاند، ئۆتۆمبێلێک لەسەر رێگای دوکان – خەلەکان ئاگریگرتووە و بەپێی لێکۆڵینەوە سەرەتاییەکان لە رێگای درۆنەوە کراوەتە ئامانج.
کامەران عەبدوڵا بەڕێوەبەری ناحیەی خەلەکان بە تۆڕی میدیایی ئێستای راگەیاند، دواینیوەڕۆی ئەمڕۆ لەسەر رێگای دوکان – خەلەکان ئۆتۆمبێلێک ئاگریگرتووە بەپێی ئەوەی کە تەقیوەتەوە و زیانی زۆری پێگەیشتووە بە شێوەیەک ئاستەمە بناسرێتەوە گومان دەکەین بە درۆن کرابێتە ئامانج.
وتیشی، ئۆتۆمبێلەکە سێ سەرنشینی تێدابووە و گیانیان لەدەستداوە، تەرمەکانیان گواستراونەتەوە بۆ نەخۆشخانەی خەلەکان بەهۆی زۆری سووتاوییەکەیان نەتوانراوە بناسرێنەوە، تەنها ئەوەندە دەزانین لە رەگەزی نێرن، بڕیارە کەمێکی دیکە تەرمەکان بۆ پەیمانگەی پزیشکی داد لە سلێمانی بگوازینەوە.
