قوباد تاڵەبانی، جێگری سەرۆك وەزیران، پێشوازیكرد لە ژەنەراڵ كیڤن لیهی، فەرماندەی نوێی هێزەكانی هاوپەیمانیی نێودەوڵەتی لە عێراق و سوریا و لە كۆبوونەوەی نێوانیاندا پتەوتركردنی پەیوەندییەكانی نێوان هێزەكانی پێشمەرگە و هێزەكانی هاوپەیمانان تاوتوێكران.
لە كۆبوونەوەكەدا كە رۆژی پێنجشەمە لە هەولێر بە ئامادەبوونی هەر یەكە لە شۆڕش ئیسماعیل، وەزیری پێشمەرگە و ستێڤ بیتنەر، كونسوڵی گشتیی ئەمریكا بەڕێوەچوو، جێگری سەرۆك وەزیران پیرۆزبایی لە ژەنەراڵ كیڤن لیهی كرد بەبۆنەی دەستبەكاربوونی وەك فەرماندەی نوێی هێزەكانی هاوپەیمانان لە عێراق و سوریا و هیوای سەركەوتنی بۆ خواست لە ئەركەكەیدا.
لە هەمانكاتیشدا ستایشی ژەنەراڵ جۆوڵ ڤاوڵ، فەرماندەی پێشووی هاوپەیمانانی كرد كە رۆڵی گرنگی بینی لە بەهێزكردنی هەماهەنگیی نێوان هاوپەیمانان و هێزەكانی پێشمەرگە و هێزە ئەمنییەكانی دیكەی كوردستان و هیواشی خواست فەرماندەی نوێی هاوپەیمانان لەسەر هەمان رێچكە بەردەوامبێت.
لەلای خۆیەوە ژەنەراڵ كیڤن لیهی، جەختیكردەوە لەسەر هەماهەنگی و هاوكاری زیاتری نێوان هێزەكانی پێشمەرگە و هاوپەیمانان لەپێناو پاراستنی ئاسایش و سەقامگیری كوردستان و عێراق و ناوچەكە.
لە بەشێكی دیكەی كۆبوونەوەكەدا گفتوگۆكرا لەبارەی چاكسازییەكانی وەزارەتی پێشمەرگە و هەردوولا هاوڕابوون لەسەر پێویستیی بەردەوامبوونی پڕۆسەی چاكسازی لە هێزەكانی پێشمەرگە و جەختیشیانكردەوە لەسەر كاری هاوبەش لەپێناو عێراقێكی سەقامگیر و كوردستانێكی یەكگرتوو و بەهێزدا.
