دامەزراوەی ڤیم فاوندەیشن بە هاوبەشی لەگەڵ شارەوانی سلێمانی و بەڕێوەبەرایەتیی ڤێتێرنەری سلێمانی پرۆژەی TNRی بۆ 500 سەگی بێلانە راگەیاند و لە ئەمڕۆوە دەست بە کارەکانیان دەکەن.
پاش بەرزبوونەوەی سکاڵای هاوڵاتییانی شاری سلێمانی سەبارەت بە زۆربوونی سەگە بێلانەکانی ناو کۆڵان و شەقامە گشتییەکانی شار و زیادبوونی مەترسی بۆ سەر گیانی هاوڵاتییان، دامەزراوەی ڤیم بە هاوبەشی لەگەڵ شارەوانی سلێمانی و بەڕێوەبەرایەتی ڤێتێرنەری سلێمانی دووبارە پرۆژەی TNR ی بۆ 500 سەگی بێلانەی ڕاگەیاند.
لە ئەمڕۆ چوارشەممەوە پرۆژەکە دەستپێدەکات و بۆ ماوەی پێنج مانگ بەردەوام دەبێت.
پرۆژەی TNR کورتکراوەی گرتن (Trap)، نەزۆککردن(Neuter) و گەڕانەوەیە (Return) پڕۆژەیەکی ئاژەڵدۆستییە کە تەرخانکراوە بۆ گرتنی سەگی بێلانە و پاشان پاکژکردنییان، نەزۆککردنیان و گەڕاندنەوەیان بۆ ناو ژینگەی خۆیان.
