پارێزگاری سلێمانی: ئەگەر مانگی دوو قوتابخانەکان نەکرێنەوە دوادەکەوێت بۆ مانگی سێ

وەزارەتی پەروەردەی حکومەتی هەرێمی کوردستان، پێشنیاری کردنەوەی دەرگای قوتابخانەکانی کردووە لە سەرەتای مانگی شوباتدا، پارێزگاری سلێمانی ڕایگەیاند، ئەگەر لە مانگی دوو-دا قوتابخانەکەن نەکرێنەوە لە مانگی سێ-دا خوێندن دەستپێدەکاتەوە.

لە لێدوانێکدا بۆ تۆڕی میدیایی ئێستا هەڤاڵ ئەبوبەکر، پارێزگاری سلێمانی ڕایگەیاند، “ئێمە لەگەڵ ئەوەداین دەرگای قوتابخانەکان بکرێنەوە و ناکرێت سێکتەرێک بەمجۆرە دابخرێت، بۆیە پێشنیازمان کردووە دەرگای قوتابخانەکان بکرێنەوە”.

پارێزگاری سلێمانی وتیشی کە ئەوان دەنگیان لەگەڵ دەنگی ئەو خوێندکارانەیە و دەیانەوێت دەرگای قوتابخانەکان بکرێنەوە و خوێندن دەستپێبکاتەوە.

هەڤاڵ ئەبوبەکر ڕاشیگەیاند، وەزارەتی پەروەردە پێشنیازی ئەوەیە لە ڕۆژی شەممەی داهاتووەوە خوێندنی پۆلی 12 لە هۆڵەکانی خوێندن دەستپێبکاتەوە و هەروەها ڕۆژی 1ی شوباتی 2021 خوێندنی قۆناغەکانی دیکە دەستپێبکاتەوە بە شێوەی ناوبەناو و بەپێی ڕێکارە تەندروستییەکان.

پارێزگاری سلێمانی ئاماژەی بەوەکرد، ئەگەر لە مانگی شوباتدا خوێندن دەستپێنەکاتەوە پێشنیازەکە بەوجۆرەیە لە بەرواری 1ی ئازاری 2021دا دەرگای قوتابخانەکان بکرێتەوە و خوێندن بەشێوەی تەواوەتی و بەردەوام دەستپێبکاتەوە.

“ئەگەر خوێندن بەوجۆرە سەرکەوتوو بوو، ئەوا بۆ وەرزی دووەم خوێندن لە مانگی ئەیلولەوە دەستپێدەکات و وەرزی دووەم تەواو دەکرێت”، بەپێی وتەی هەڤاڵ ئەبوبەکر.

جەختیشی کردەوە کە ئەگەری بایکۆتی مامۆستایان داوایەکی ڕەوای مامۆستایانە و دەبێت موچەی مامۆستایان و فەرمانبەران لە کاتی خۆیدا و 30 ڕۆژ جارێک بەتەواوی دابەشبکرێت چونکە ئەوە کێشەیەکی گەورەیە.

بابەتی پێشتر

هۆکاری توڕەیی زێدان لە ڤینیسیۆز ئاشکرابوو

بابەتی دواتر

دەستپێكردنەوەی خوێندنی قۆناغەكانی دیكە جگە لە 12ی ئامادەیی دواخرا

بابەتی پەیوەندیدار
Total
2
Share