دوای تێپەڕبوونی ماوەیەکی زۆر کە زیاتر لە حەوت مانگ بوو بەسەر ئەنجامدانی هەڵبژاردنی ئەنجومەنی پارێزگاکانی عێراق، پۆستە ئیدارییەکانی شاری کەرکوک لە بەرژەوەندی کورد یەکلاکرانەوە و رێبوار تەها بووە پارێزگاری نوێی پارێزگاکە.
لەماوەی رابردوودا، یەکێتی نیشتمانیی کوردستان وەک براوەی هەڵبژاردنەکان و خاوەنی زۆرترین دەنگ هەوڵیدا، لایەنە کوردییەکانی ئەنجومەنی پارێزگای کەرکوک یەکدەنگ بن و لایەنەکانی دیکەی پارێزگاکەش لە کابینەی حکومەتی خۆجێیی شارەکەدا جێبکاتەوە.
بەڵام چەند جارێک، ئەم هەوڵە پەکخرا و لایەنێکی سیاسیی کوردی لە شارەکە هەوڵیدا لەگەڵ تورکمان و عەرەب ئەنجومەنەکە پێکبهێنێت و پۆستی پارێزگاری شارەکەیان پێشکەش بکات.
لە کۆتاییدا، شەوی رابردوو، کۆبوونەوەیەک زۆرینەی ئەندامانی ئەنجومەنی پارێزگای کەرکوکی لە بەغداد کۆکردەوە و دەنگدرا بە رێبوار تەها، ئەندامی یەکێتی ئەنجومەنەکە بۆ وەرگرتنی پۆستی پارێزگاری کەرکوک و کۆتاییهێنان بەو دۆخەی چەندین ساڵ بوو بەسەر پارێزگاکەدا سەپیبوو.
رێبوار تەها، پارێزگاری نوێی كەركوك لە پەیامێكیدا رایگەیاند، “لە ئەمڕۆوە رۆژێكی نوێ لە كەركوك دەستپێدەكات و پیرۆزبایی لە هاوڵاتییانی شاری كەركوك و سەرجەم پێكهاتەكان دەكەین و كەركوك و كەركوكییەكان شایەنی خزمەتكردنن”.
هاوکات، بافڵ جەلال تاڵەبانی، سەرۆکی یەکێتی نیشتمانیی کوردستان دوای هەڵبژاردنی پارێزگاری نوێی كەركوك رایگەیاند، “پێویست دەكات كەركوك ئاشتبكەینەوە و كەركوك دەكەینە نموونەی پێكەوەژیان و نموونەیی ئارامی و بەڵێنەكانمان بەرامبەر كەركوكییەكان جێبەجێدەكەین”.
