رۆژنامەی شەرق ئەلئەوسەت لە راپۆرتێکدا ئاشکرایدەکات، ئەو پارەیەی لە تاوانی دزی سەدەدا دزرا بە نزیکەیی 11 ترلیۆن دینارە و تا ئێستا تاوانبارە راستەقینەکە دەستگیرنەکراوە.
لە راپۆرتەکەدا هاتووە، چاوەڕێ دەکرێت ئاڕاستەی لێکۆڵینەوەکان لە تاوانی دزی سەدە بەرەو ئاشکراکردنی شاخێک لە گەندەڵی بمانبات، گومانیش دەکرێت تا ئێستا ئەو تاوانە بەردەوامیی هەبێت.
ئاشکراشیکرد، ئەو پارەیەی دزراوە زۆر زیاترە لەو بڕەی لە رابردوودا باسدەکرا، پێدەچێت بڕەکەی بگاتە 11 ترلیۆن دینار، کە لەو بڕە تەنها 600 ملیار دیناری گەڕێندراوەتەوە.
هەر لە راپۆرتەکەدا باسلەوەکراوە، تا ئێستا نۆ کەس لەسەر ئەو تاوانە دەستگیرکراون، کە وەک ئامرازێک بەکارهێنراون، تا ئێستا نەتوانراوە دزە راستەقینەکە بدۆزرێتەوە، هۆکاری ئەمەش ئەوەیە کەسەکە دەسەڵاتی هەیە و دەتوانێت خۆی بدزێتەوە.
