ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، بۆ ناردنی مووچە وەزارەتی دارایی عێراق دەیەوێت وردبینی لە لیستی مووچەی مووچەخۆرانی هەرێم بكات و لە هەمانكاتدا هیچ زیادكردنێك لە لیستەكاندا روونەدات.
موعین كازمی، ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا رایگەیاند، دادگای فیدراڵی و بانكی ناوەندیی عێراق دەیانەوێت بە بانكیكردنی مووچەی مووچەخۆرانی هەرێم لە رێگای بانكە فیدراڵییەكانەوە بێت و لەبەرامبەردا هەرێمی كوردستان دەیەوێت لە بانكی دیكەوە بێت.
وتیشی، “بۆ ناردنی مووچە، وەزارەتی دارایی عێراق دەیەوێت وردبینی لە لیستی مووچەی فەرمانبەران و هێزە ئەمنییەكان بكات و لە هەمانكاتدا هیچ زیادكردنێك لە لیستەكەدا روونەدات كە ئەوانەش هۆكارن بۆ دواكەوتنی مووچە”.
راشیگەیاند، “ئومێدەوارین مووچەی فەرمانبەرانی هەرێم هاوشێوەی ناوچەكانی دیكەی عێراق مانگانە لە كاتی خۆیدا دابەشبكرێت”.
