دە ساڵ بەسەر هێرشی چەكدارانی داعش بۆسەر قەزای شەنگال و دەوروبەری تێپەڕدەبێت، لەو رووداوەی هاوڵاتییانی ئێزدی خرانە بەردەم چارەنووسی كوشتن و رفاندن، یان هەڵهاتندا.
بەرەبەیانی زووی 3ی ئابی 2014 هێرشی چەكدارانی رێكخراوی دەوڵەتی ئیسلامی لە عێراق و شام (داعش) بۆسەر شەنگال و گوند و ناوچەكانی دەوروبەری دەستپێكرد، لەماوەیەكی كەمدا بەشێكی بەرچاوی سنوورەكە بە دانیشتوانەكانیانەوە كەوتە دەست چەكدارانی گروپەكە.
لە رۆژانی دواتردا پڕۆسەیەكی بەرفراوان و بەرنامەبۆداڕێژراو دژ بە گەلی ئێزدی دەستیپێكرد، بەهۆیەوە زیاتر لە 10 هەزار ئێزدی شەهید و بێسەروشوێن بوون، 360 هەزار كەس ئاوارەبوون، چەندان گوند و پەرستگای ئێزدییەكان وێرانكران، پیاوان بەكۆمەڵ كوژران و ژێرخاك نران، كچ و ژنانی گەنج-یش وەك سەبایا و كەنیزەك رەوانەی موسڵ و رەققە و ناوچەكانی ژێر دەسەڵاتی بەناو خەلافەت كران.
ئەو هاوڵاتییانەی توانییان هەڵبێن، بەشێكی زۆریان پەنایان بردەبەر چیای شەنگال و بۆ ماوەی چەندین رۆژ بێ نان و ئاو مانەوە، بەهۆیەوە ژمارەیەكیان لە برسێتی و تینوێتیدا گیانیان لەدەستدا.
ئێزدییەكان خاوەنی ئاینی تایبەت بە خۆیانن و زۆربەیان لە شەنگال و دەڤەری شێخان دەژین، ھەروەھا لە بۆتان و دەربێسیە و باکووری پارێزگای حەسەکە و عەفرین لە حەلەب و ئەلەگەزی ئەرمەنستان و پارێزگای قەرس و ئەردێخانی باکووری رۆژھەڵاتی تورکیادا دەژین، جیاوازیی ئاینەكەیان بیانوویەكی گەورەبوو بۆ هێرشە دڕندانەكەی سەریان و هەوڵدان بۆ پاكتاوكردنیان.
جینۆساید
لە ئابی 2019، پەرلەمانی کوردستان لە كۆبوونەوەیەكی نائاساییدا رۆژی 3ی ئابی وەک رۆژی جینۆسایدی کوردانی ئێزدی دیاریکرد.
