لە گوندی ساوای سەر بە ناحیەی خەلیفان، پێنج کەس کەوتنە نێو ئاو و یەکێکیان خنکا، یەکێک لە رزگارکراوان لە ژێر چاودێریی چڕی پزیشکیدایە.
بەڕێوەبەرایەتیی بەرگریی شارستانیی ئیدارەی سۆران، لە راگەیەندراوێکدا بڵاویکردەوە، کەمێک بەر لە ئێستا ئاگادارکراینەوە بە بوونی حاڵەتێکی خنکان لە ناحیەی خەلیفان/ گوندی ساوا، دەستبەجێ تیمی پاراستنی رووباری سۆران دەرچوون بۆ شوێنی رووداوەکە.
لە راگەیەندراوەکەدا هاتووە، دەرکەوت پێنج کەس کەوتونەتە نێو ئاو، لە ئەنجامدا کچێک بەناوی لانە محەمەد ئەمین-ی تەمەن 14 ساڵان خنکاوە و تەرمەکەی دەرهێنرا.
باس لە ئەوەش دەکات، دوو کەسی دیکە بە ناوەکانی ئاشنا محەمەد ئەمین تەمەن 17 ساڵان و سیما حەسەن تەمەن 19 ساڵان رەوانەی نەخۆشخانە کران و ئاشنا محەمەد لەژێر چاودێریی چڕدایە و دوو کەسی دیکە کە خەڵکی ناوچەکە بوون بەسەلامەتی رزگارکران.
بەپێی ئامارەکانی بەرگریی شارستانیی سۆران، ئەمساڵ ئەمە 12 هەمین حاڵەتی خنکانە لە سنووری ئیدارەی سەربەخۆی سۆران تۆماردەکرێت.
