بۆ پڕكردنەوەی پێداویستیی بازاڕ و خواستی هاوڵاتییان لە سلێمانی پشت بە مریشك و هێلكەی پرۆژەكانی ناوخۆ دەبەسترێت، قائیمقامیەتی شارەكەش دەڵێت، ئەو سەوزە و میوەیەش كە لە بازاڕدایە بە رێژەی 80% بەرهەمی ناوخۆییە.
قائیمقامیەتی سلێمانی رایگەیاند، بە مەبەستی دانانی هاوسەنگیی بەروبومی ئاژەڵی و پەلەوەری و بەرهەمەکانی سەوزە و میوە لە سلێمانی، ئەمڕۆ هەردوو لیژنەی دیاریكردنی بەروبومی ئاژەڵی و پەلەوەری و لیژنەی دانانی هاوسەنگیی بەرهەمی سەوزە و میوە کۆبوونەوەی مانگانەی خۆی لە دیوانی قائیمقامیەت ئەنجامدا.
لە کۆبوونەوەی یەکەمدا بریاردرا بە هەماهەنگی لایەنە پەیوەندیدارەکان رێگری لە بەرزبوونەوەی نرخ بکرێت و لە پرکردنەوەی پێداویستیی بازاڕدا پشت بە مریشک و هێلکەی پرۆژەکانی ناوخۆ ببەسترێت.
چونكە وەك ئەوەی لیژنەكە ئاماژەی پێداوە، بەرهەمی پرۆژەکانی ناوخۆی مریشک و هێلکە لە مانگی تەمموز و ئابدا نزیکدەبێتەوە لە 650 تۆن مریشک مانگانە و 400 هەزار کارتۆن هێلکە رۆژانە، کە ئەمەش رێژەیەکی بەرزە و جگە لەوەی پێداویستیی ناوخۆ پڕدەکاتەوە، دەتوانرێت زیادەی بەرهەمیش رەوانەی دەرەوە و پارێزگاکانی ناوەڕاست و باشووری عێراق بکرێت.
دەشڵێت، لە چوارچێوەی بڕیار و رێنماییەکانی حکومەتی هەرێمی کوردستان، رێگە بە هاوردەکردنی گۆشت و ئاژەڵی زیندوو و ماسی دەدرێت و هاوردەکردنیان لە مانگی ئاب دا کراوە دەبێت.
لە کۆبوونەوەی دووەمدا، باس لەو هەنگاوانە کرا کە پێویستە بگیرێنەبەر بۆ دانانی هاوسەنگی لە نێوان بەرهەمی سەوزە و میوەی ناوخۆ و هاوردەکراودا، کە رێژەی بەرهەمی ناوخۆ لە وەرزی هاویندا لە ئاستێکی بەرزدایە و ئەو سەوزە و میوەیەی لە مانگەکانی حوزەیران بۆ کۆتایی ئەیلول لە بازاڕدایە 80%ی بەرهەمی ناوخۆییە و بەشێوەیەکی تەندروست و لەژێر چاودێریدا بەرهەم دەهێنرێن، وەك ئەوەی لە راگەیەندراوەكەی قائیمقامیەتی سلێمانیدا هاتووە.
