وەزارەتی پێشمەرگە رایدەگەیەنێت، بەبەشداریی سەرۆكی ئەركانی وەزارەتی پێشمەرگە دیالۆگی هاوبەشیی ئەمنی نێوان ئەمریكا عێراق بەڕێوەچوو.
بەپێی راگەیەنداوێكی وەزارەتی پێشمەرگە كە وێنەیەكی دەست تۆڕی میدیایی ئێستا كەوتووە و تێیدا هاتووە، لە درێژەی ئەو زنجیرە كۆبوونەوانەی كە لەنێوان هەردوو حكومەتی عێراق و ئەمریكا بەڕێوەدەچێت و گەرێكی دیكەی دیالۆگی هاوبەشیی ئەمنی لە نێوان وەفدی وەزارەتی بەرگریی عێراق بە سەرۆكایەتیی سابت محەمەد ئەلعباسی، وەزیری بەرگریی عێراق و ئەندامییەتی فەریقی یەكەم روكن عەبدولئەمیر رەشید یاروڵا سەرۆكی ئەركانی سوپای عێراق و فەریق روكن عیسا عوزێر سەرۆكی ئەركانی وەزارەتی پێشمەرگە و چەند ئەفسەرێكی باڵای وەزارەتی بەرگریی عێراق و وەزارەتی پێشمەرگە، لەگەڵ لەگەڵ لۆید ئۆستن، وەزیری بەرگریی و وەفدی وەزارەتی بەرگریی ویلایەتە یەكگرتووەكانی ئەمریكا كۆبوونەوەیەك بەڕێوەچوو.
لە راگەیەندراوەكەدا هاتووە، لە كۆبوونەوەكەدا گفتوگۆكرا لەبارەی باشتركردنی پەیوەندییەكانی نێوان هەردوولا و قووڵكردنەوەی هاوكارییە ئەمنییەكان و كۆمەڵێك پرسی دیكە و پێشخستنی بەرژەوەندیی هاوبەشی هەردوو وڵات، بە تایبەتی لە رووی ئاسایش و پاراستنی سەروەریی عێراق و سەقامگیری بۆ ناوچەكە.
لە كۆبوونەوەكەدا، نوێنەرانی عێراق پابەندیی وڵاتەكەیان بە پاراستنی راوێژكارانی بیانی و دیپلۆماتەكانیان دووپاتكردەوە و دوو وڵاتەكە بڕیاریانداوە هێزە ئەمنییە كوردییەكانیش بەشێك بن لە پاراستنی سەروەری و سەقامگیری، هەروەها جەختیان لەوەكردووەتەوە راوێژكارانی نێودەوڵەتی لەسەر بانگهێشتی عێراق و بۆ پشتیوانیكردنی هێزە ئەمنییەكانی عێراق لەوێن.
