وەزارەتی كارەبای هەرێم رایدەگەیەنێت سبەینێ مووچەی مانگی حوزەیرانی وەزارەتی كارەبا دابەشدەكرێت و دەشڵێت، “بە نووسراوی رەسمی ئەو تێبینییانەی لە راپۆرتی هەردوو دیوانی چاودێریی دارایی عێراق و هەرێمدا هەبوون چارەسەركراون”.
بەپێی راگەیەندراوێكی وەزارەتی كارەبای هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، سبەینێ مووچەی مانگی حوزەیرانی وەزارەتی كارەبا دابەشدەكرێت و لە ماوەكانی رابردوودا بەردەوام وەزیری كارەبا لەگەڵ وەزیری دارایی و لایەنە پەیوەندارەكان لەسەر هێڵبوون بۆ چارەسەركردنی گرفتەكە.
هەر لە راگەیەندراوەكەدا هاتووە، بە نووسراوی رەسمی ئەو تێبینییانەی لە راپۆرتی هەردوو دیوانی چاودێریی دارایی عێراق و هەرێمدا هاتبوون چارەسەركراون، لەم پێناوەشدا خەرجیی مووچە و تەواوی شایستە داراییەكانی پۆلیسی كارەبای هەرێم لەسەر میلاكی وەزارەتی كارەباوە بۆ سەر میلاكی وەزارەتی ناوخۆ گواستراوەتەوە.
