بەرپرسێكی یەكێتی رایدەگەیەنێت، رێکەوتنی پارتی لەگەڵ لایەنە عەرەب و تورکمانەکانی کەرکوک هەراجکردنی کوردستانە نەک تەنها کەرکوک.
شێرزاد سەمەد، لێپرسراوی بەشی هەڵبژاردنی یەکێتیی نیشتمانیی کوردستان لە کەرکوک بە تۆڕی میدیایی ئێستای راگەیاند، رێکكەوتنی پارتی لەگەڵ لایەنە عەرەب و تورکمانەکانی کەرکوک لە کۆبوونەوەی سێیەمی سودانی لەگەڵ لایەنە سیاسییەکانی کەرکوک خرایەڕوو، بەهۆی ئەوەی بەتەنیا ناتوانن رێژەی یاسایی ئەندامانی ئەنجومەن تەواوبکەن.
وتیشی، “لەگەڵ ئەوەشدا، ئەم هەوڵانە جگە لە خۆسوککردن و هەراجکردنی ئیرادەی خەڵکی کەرکوک هیچی دیکەی لێسەوز نابێت و دووبەرەکی و ناکۆکی لێدەکەوێتەوە”.
بەرپرسەكەی هەڵبژاردنی یەكێتی باسی لەوەشکرد، پارتی لە هەرێم لە مەسەلەی حوکمداری، مووچە و بەڕێوەبردن شکستی هێناوە، دەیەوێت بۆ پەردەپۆشکردنی ئەو شکستانەی کێشەکان بۆ کەرکوک بگوازێتەوە.
جەختیشیکردەوە، “ئەم هەوڵانە، هەوڵی خیانەتکارانەی گەورەن کە هەموو کەرکوکییەکانیش دەزانن، بەڵام ئەوان هەموو کوردستانیان هەراجکردووە، نەک تەنها کەرکوک”.
