بڕیارە بە فشاری هاوڕێ نزیکەکانی لە چەند رۆژی داهاتوودا جۆ بایدن سەرۆکی ئەمریکا و کاندیدی خولێکی دیکەی سەرۆکایەتیی لە کێبڕکێی هەڵبژاردنەکان بکشێتەوە.
پێگەی ئەکسیۆس_ی ئەمریکی بڵاویکردووەتەوە، لەدوای ئەو فشارانەی بەشێک لە ئەندامان و لایەنگران و گۆنگرێسمانەکانی دیموکراتەکان دروستیانکردووە، بڕیارە لە چەند رۆژی داهاتوودا ژمارەیەک لە هاوڕێ و کەسە نزیکەکانی، بایدن رازی بکەن لە کێبڕکێی هەڵبژاردنەکان بکشێتەوە.
ئەم هەوڵە لە کاتێکدایە، بەشێک لە دیموکراتەکان پێیان وایە بەهۆی ئەو ئاستەی بایدن لە بانگەشەی هەڵبژاردن و دیبەیتەکانیدا هەیبووە، هاوکات لەگەڵ زۆری تەمەنی و خراپی دۆخی تەندروستی، لەدەستدانی خولێکی دیکەی سەرۆکایەتیی ئەمریکا بۆ دیموکراتەکان مسۆگەربووە.
لە دوێنێ چوارشەممە کۆشکی سپی ئەمریکا بڵاویکردووەتەوە، جۆ بایدن تووشی ڤایرۆسی کۆرۆنا بووە و لە ماڵەکەی خۆیدا لە ویلایەتی دیلاوێر خۆی کەرەنتین کردووە.
