بەڕێوەبەری راگەیاندن لە سەرۆكایەتیی شارەوانیی سلێمانی رایدەگەیەنێت، وەكو فەرمانگەكانی دیكە دەستمان بە دابەشكردنی فۆڕم بۆ پێدانی زەوی بە فەرمانبەراندا كردووە و دەشڵێت، ” بەشێك لە خانەنشینان دەتوانن لە وەرگرتنی زەوی سوودمەندبن”.
زەردەشت رەفیق، بەڕێوەبەری راگەیاندن لە سەرۆكایەتیی شارەوانیی سلێمانی لە لێدوانێكدا بە تۆڕی میدیایی ئێستای راگەیاند، دابەشكردنی فۆڕم پەیوەندیی بە شارەوانییەوە نییە و فەرمانگەكان فۆڕمەكەیان لە وەزارەتەوە بۆ دەنێردرێت و دابەشیدەكەن و لە ئێستادا لە سەرۆكایەتیی شارەوانیی سلێمانی دەستكراوە بە دابەشكردنی فۆڕم بەسەر فەرمانبەراندا.
وتیشی، “ئەو فەرمانبەرانەی سوودمەنددەبن دەبێت هەشت ساڵ خزمەتی كەمتر نەبێت، سوودمەندنەبووبێت لە وەرگرتنی زەوی و یەكەی نیشتەجێبوون لە پێشتردا و سێ ناوچە بۆ پێدانی زەوی بە فەرمانبەران دیاریكراوە كە بریتین لە تاسڵوجە، سۆتكە و تانجەرۆ”.
راشیگەیاند، بەشێك لەو خانەنشینانەی كە لە ماوەی ساڵی رابردوو یاخود چەند مانگێك لەمەوبەر خانەنشین بوون دەتوانن فۆڕم پڕبكەنەوە لە وەرگرتنی زەوی سوودمەندبن كە دەبێت مەرجەكان بیانگرێتەوە”.
