شەش حزب و لایەنی سیاسیی هەرێم داوادەكەن لەمساڵدا دەستوور یەكلابكرێتەوە و هەڵبژاردنی پەرلەمانیش لە كاتی خۆیدا بكرێت.
لایەنەكان كە پێكدێن لە هەریەك لە (حزبی شیوعی كوردستان، حزبی زحمەتكێشانی كوردستان، حزبی سۆسیالیست دیموكراتی كوردستان، یەكێتی نەتەوەیی دیموكراتی كوردستان و پارتی كرێكاران و رەنجدەرانی كوردستان) لە ڕاگەیەندراوێكدا هەڵوێستی هاوبەشی خۆیان ڕاگەیاندووە و دەڵێن، “پرسی دەستوور پرسێكی نیشتمانییە و پێویستە لەمساڵدا یەكلابكرێتەوە و ببینە خاوەن دەستووری خۆمان و ساڵی 2022 بكەینە ساڵی دەستووری كوردستان”.
هەروەها سەبارەت بە هەڵبژاردن جەخت لەسەر ئەنجامدانی لە كاتی خۆیدا دەكەنەوە.
دەربارەی یاسای هەڵبژاردنیش لایەنەكان یاسای ئێستا بە گونجاو بۆ واقیعی كوردستان ناودەبەن و دەڵێن، “پێویستە وەك خۆی بمێنێتەوە”.
لایەنەكان تێبینیی خۆشیان لەسەر كۆمسیۆنی هەڵبژاردن خستووەتەڕوو و بە پێویستی دەزانن “كۆمیسۆنی هەڵبژاردن لە كەسانی یاسایی و تەكنۆكرات پێكبێت و سەربەخۆ و پیشەییانە كارەكانی خۆی ڕاییبكات و سەرپەرشتیی پرۆسەی هەڵبژاردن بكات”.
