ئەنجامی کۆتایی هەڵبژاردنی سەرۆک کۆماری ئێران راگەیەندرا و مەسعود پزیشکیان بوو بە نۆیەمین سەرۆکی وڵاتەکە.
بەپێی میدیا ئێرانییەکان، لە 14-هەمین خولی هەڵبژاردنی سەرۆکایەتیی کۆماری ئێراندا مەسعود پزیشکیان، لە کۆی 30 ملیۆن و 573 هەزار و 931 دەنگ، 16 ملیۆن و 384 هەزار و 403 دەنگی بەدەستهێناو بووە نۆیەمین سەرۆک کۆماری وڵاتەکە.
لەبەرامبەردا سەعید جەلیلی کاندیدەکەی دیکەی پۆستی سەرۆکایەتیی کۆماری ئێران 13 ملیۆن و 538 هەزار و 179 دەنگی بەدەستهێنا.
مەسعود پزیشکیان لە یەکەم لێدوانی دوای هەڵبژاردنی وەک سەرۆک کۆماری نوێی ئێران رایگەیاند، ” دەستی دۆستایەتی بۆ هەمووان درێژ دەکەین، هەموومان خەڵکی ئەم وڵاتەین”.
دوو هەینی لەسەر یەک پرۆسەی هەڵبژاردنی سەرۆک کۆماری ئێران بەڕێوەچوو، و لە هەر گەڕێکی هەڵبژاردنەکە چەندین جار وادەکەی درێژکرایەوە.
