بەڕێوەبەرایەتیی پۆلیسی راپەڕین بڵاویکردەوە، لە رانیە کەسێک دەستگیرکرا کە خۆی وەک کارمەندی هێزی ئەمنی ناساندبوو، هەڕەشەی لە کەسێک کردبوو و داوای کاری نەشیاوی لێکردبوو.
لە راگەیەندراوەکەی پۆلیسی راپەڕیندا ئەوەش هاتووە، دوای تۆمارکردنی سکاڵا لەلایەن هەڕەشەلێکراوەوە، پەڕاوی لێکۆڵینەوە رێکخرا و بڕیاری دەستگیرکردن بۆ تۆمەتبارە نادیارەکە دەرچوو، دواتریش دوای لێکۆڵینەوە و بەدواداچوون، کەسەکە دۆزرایەوە و دەستگیرکرا.
پۆلیس ئاماژەی بەوەشکردووە، تۆمەتبار لەبەردەم دادوەر و پۆلیسدا دانی بە تاوانەکەیدا ناوە و دادوەر بڕیاری راگرتنی بەگوێرەی ماددەی 430 لە یاسای سزادانی عێراقی دەرکردووە و لێکۆڵینەوەکان بەردەوامن.
