بەیانیی ئەمڕۆ دەنگدان بۆ خولی دووەمی هەڵبژاردنی سەرۆكایەتیی ئێران بەمەبەستی هەڵبژاردنی سەرۆكی نوێ كە لە خولی یەكەمدا نەتوانرا یەكلابكرێتەوە دەستیپێكرد.
ناوەندەكانی دەنگدان لە سەرتاسەری ئەو وڵاتە كاتژمێر 7:30ی بەیانیی ئەمڕۆ بەكاتی هەرێمی كوردستان بەڕووی دەنگدەراندا كرانەوە و چاوەڕوان دەكرێت تا كاتژمێر 10ی ئەمشەو كراوەبن.
لەم خولەی هەڵبژاردنەكەدا خاوەن دەنگی یەكەم و دووەمی خولی یەكەم هەریەك لە مەسعود پزشکیان و سەعید جەلیلی رکابەرى بەدەستهێنانی پۆستی سەرۆك كۆماری داهاتووی ئێران دەكەن.
بەپێی راگەیەندراوی پێشووی وەزارەتی ناوخۆی ئێران، زیاتر لە 61 ملیۆن كەس مافی بەشدارییان لە دەنگداندا هەیە و لە ماوەی دیاریكراودا دەتوانن روو لە سندوقەكانی دەنگدان بكەن.
