بە بڕیارێکی محەمەد شیاع سودانی سەرۆک وەزیرانی عێراق پۆستی سەرۆکی دەستەی راوێژکاران لە پارێزگای کەرکوک هەڵوەشایەوە.
بەپێی نووسراوێکی نووسینگەی سەرۆک وەزیرانی عێراق بڕیاردراوە، پۆستی سەرۆکی دەستەی راوێژکارانی کەرکوک هەڵبوەشێتەوە و بگۆڕێت بۆ دەستەی راوێژکاری بێ ئەوەی سەرۆکێکی بۆ دەستنیشانبکرێت.
هەر بەپێی نووسراوەکە، ناوی ئەندامانی دەستەکە لە راوێژکارەوە بۆ شارەزا گۆڕاوە ئەمەش بەپێی ماددەی 34 ی یاسای پارێزگاکانی ژمارە 21 ی ساڵی 2008.
جگە لە بڕیارەکانی سەرەوە سودانی بڕیاریداوە بڕیاری دەستبەکاربوونی عیماد خەڵەف دەهام وەک سەرۆکی دەستەکە هەڵبوەشێنێتەوە.
هاوکات سودانی فەرمانی کردووە بە دروستکردنی لیژنەی لێکۆڵینەوە لە کارەکانی پارێزگا و بەشەکانی پێکبهێنرێت و دۆسیەکانیان رەوانەی دەستەی دەستپاکی عێراق بکرێت بە مەبەستی گرتنەبەری رێوشوێنی پێویست.
