بەڕێوەبەرایەتیی گشتیی بەرگریی شارستانیی هەرێم بڵاویکردەوە،لە کاتی گەشت و سەیران بۆ ئەو ناوچانەی ئاوی لێیە، لەپێناو سەلامەتی پێویستە هاوڵاتییان رەچاوی چەند خاڵێک بکەن و نابێت لە هەموو جێگەیەک مەلە بکەن.
بەڕێوەبەرایەتییەکە رێنماییەکانی لە 10 خاڵدا کۆکردووەتەوە کە ئەمانەن:
١- مەلەکردن لەو شوێنانەی کە شارەزاییت لەسەریان نییە، زۆر مەترسیدارە.
٢- ئەو شوێنانەی تابلۆی قەدەغەی لێ دانراوە، گونجاونین بۆ مەلەکردن، چونکە لە لایەن تیمەکانی بەرگریی شارستانی، پشکنینیان بۆ کراوە و مەترسیدارن.
٣-ئەگەر مەلە دەکەی، لەو شوێنانە مەلە بکە کە قەرەباڵغە و کەسی مەلەزان و تیمەکانی بەرگریی شارستانی لێیە، بۆ ئەوەی ئاگادارت بن لە هەر دۆخێکی لەناکاو.
٤-بەبێ هیچ ئامرازێکی خۆپاراستن، وەک هێلەک و چوپ و هتد مەلە مەکە.
٥- ئاوەکانی سنووری ناوچە شاخاوییەکان سارد و تیژڕەون، بۆ مەلەکردن گونجاو نین.
٦- ئاوی زێی گەورە، زێی بچووک، قووڵی و تەنکییان دیاریکراو نییە، بەهۆی کارکردنی کارگەکانی دەرهێنانی قوم و چەگل، ئاڕاستە و قووڵییان گۆڕدراوە، بۆیە وریا بن لە هەموو شوێنێک مەلە مەکەن.
٧- بە هیچ شێوەیەک بەنداوەکان بۆ مەلەکردن شیاو نین.
٨- یاریکردن و گاڵتەوگەپ لە ناو ئاو، دەبێتە هۆی تەنگەنەفەسی و ماندووبوون و شڵەژان.
٩- هیچ کات منداڵ لەگەڵ خۆت مەبە بۆ مەلەوانی، چونکە ژیانی دەکەوێتە مەترسییەوە.
١٠ – لە هەر بارودۆخێک پێویستیت بە هاوکاری بوو، تکایە بە زووترین کات پەیوەندی بە ژمارە ١١٥ بکەن، بۆ ئەوەی بەزووترین کات تیمەکانی بەرگریی شارستانی بەهاناتەوە بێن.
