قوباد تاڵەبانی، جێگری سەرۆك وەزیرانی هەرێم، لە دووەم رۆژی سەردانەكەیدا بۆ ئیدارەی راپەڕین، لەگەڵ یانە وەرزشییەكانی سنوورەكە و تیپە میللییەكان و وەرزشوانانی دەڤەرەكە كۆبووەوە و گوێبیستی كێشە و گرفت و داواكارییەكانیان بوو.
لە كۆبوونەوەكەدا كە ئەمڕۆ بەڕێوەچوو، یانە وەرزشییەكان داوایانكرد خولی تایبەتیان بۆ بكرێتەوە و پشتیوانی چالاكییە وەرزشییەكانیان بكرێت بە تایبەت خولەكانی كچان و ژنان.
لای خۆشییەوە قوباد تاڵەبانی بڕیاریدا كۆمەڵێك لە داواكارییەكانیان دەستبەجێ جێبەجێبكرێن و پێكهێنانی لیژنە بۆ بەدواداچوونی كێشەكانی یاریگای حاجی ئاوا، هەروەها لایەنە پەیوەندیدارەكانی سنووری ئیدارەی راپەڕینی ڕاسپارد بەدواداچوون بكەن بۆ جێبەجێكردنی داواكارییەكانی تریان بەمەبەستی پێشخستن و بەهێزكردنی ژێرخانی وەرزش لە ئیدارەی راپەڕین و پشتیوانیكردن لە وەرزشكاران.
لە كۆبوونەوەكەدا یانە وەرزشییەكانی رانیە، سەنگەسەر، حاجی ئاوا، چوارقوڕنە بەشداربوون لەگەڵ یاریزانە دیارەكانی یانەكان لەگەڵ لیژنەی باڵای تیپە میللییەكان و ژمارەیەك لە وەرزشوانی تری سنوورەكە.
