ئەمڕۆ دوا رۆژی نوێكردنەوەی تۆماری دەنگدەرانە و بەرپرسێكی كۆمسیۆن دەڵێت، چاوەڕوانی دیاریكردنی وادەی نوێی هەڵبژاردنی پەرلەمانی كوردستانن.
ئامانج عەزیز، بەرپرسی ئۆفیسی سلێمانی كۆمسیۆنی باڵای سەربەخۆی هەڵبژاردنەكان بە تۆڕی میدیایی ئێستای راگەیاند، دوای ئەوەی بۆ دووەمجار لەمساڵدا پرۆسەی نوێكردنەوەی تۆماری دەنگدەران راگەیەنرا، كاتژمێر 3ی پاش نیوەڕۆی ئەمڕۆ پرۆسەكە كۆتایی دێت.
وتیشی، لەم ماوەیەدا لەدایكبووانی ساڵی 2006 و بەرەو خوار مافی نوێكردنەوەی زانیارییەكانیان هەبوو، ئەمڕۆش دواوادەیە.
ئامانج عەزیز رەتیشیكردەوە جارێكی دیكەی وادەی نوێكردنەوەی تۆماری دەنگدەران درێژبكرێتەوە.
ئاماژەی بەوەشكرد، دوای ئەوەی كۆمسیۆن نووسراوێكی ئاراستەی سەرۆكایەتیی هەرێم كرد و تیایدا پێشنیاری 5ی ئەیلولی بۆ بەڕێوەچوونی هەڵبژاردن كردووە، چاوەڕوانی سەرۆكایەتیی هەرێمن بۆ ئەوەی رێوشوێنەكانی ئامادەكاریی هەڵبژاردنی پەرلەمانی كوردستان ئەنجامبدەن.
