جێگری سەرۆك وەزیران لەگەڵ وەفدێكی رێكخراوی WFP سەردانی ناوچەی تانجەرۆ دەكەن و تاوتوێی چارەسەری كێشەی خۆڵ و خاشاك و پاككردنەوەی ئاوی تانجەرۆ دەكەن.
قوباد تاڵەبانی، جێگری سەرۆک وەزیران بە یاوەری نزار محەمەد سەعید ئامێدی، وەزیری ژینگەی عێراق و وەفدێکی رێکخراوی خۆراکی جیهانی (WFP) بۆ چارەسەرکردنی کێشەی خۆڵ و خاشاکی سلێمانی و پاککردنەوەی ئاوی تانجەرۆ، سەردانی ناوچەی تانجەرۆیان کرد.
دوای سەردانە مەیدانییەکە کە ئەمڕۆ شەممە (1ی حوزەیرانی 2024) بە ئامادەبوونی بەڕێوەبەرایەتی و لایەنە پەیوەندیدارەکانی پارێزگای سلێمانی ئەنجامدرا، لە کۆبوونەوەیەکدا باسی مەترسییەکانی کەڵەکەبوونی خۆڵ و خاشاک و پیسبوونی ئاوی تانجەرۆ و دەربەندیخان بۆ سەر ژینگە و تەندروستیی هاوڵاتییان کرا و گفتوگۆش کرا لەسەر چۆنییەتیی چارەسەرکردنی کێشەکە.
جێگری سەرۆک وەزیران لە کۆبوونەوەکەدا داوایکرد لایەنە پەیوەندیدارەکانی حکومەتی هەرێم لەگەڵ وەزارەتی ژینگەی عێراق و رێکخراوی WFP پلانێکی زانستی بۆ چارەسەرکردنی خێرا و دوورمەودا ئامادەبکەن و ئامادەیی حکومەتی هەرێمیشی دەربڕی بۆ کاری هاوبەش لەپێناو چارەسەرکردنی کێشەکە.
هەر لە کۆبوونەوەکەدا نزار محەمەد سەعید ئامێدی وەزیری ژینگەی عێراق، ئامادەیی وەزارەتەکەی دەربڕی بۆ کاری پێکەوەیی لەگەڵ حکومەتی هەرێم و رێکخراوی WFP و سەرپەرشتیکردنی چارەسەرکردنی کێشەکە.
لە کۆتایی کۆبوونەوەکەدا بڕیاری پێکهێنانی لیژنەیەکی هاوبەش لە لایەنە پەیوەندیدارەکانی پارێزگای سلێمانی و وەزارەتی ژینگەی عێراق و رێکخراوی WFP و رێکخراوە نێودەوڵەتییەکانی دیکە درا بۆ ئامادەکردنی پلان و دواتریش جێبەجێکردنی پلانەکە.
